【懷孕證明】私家診所 vs 家計會驗孕

 


當發現懷孕,首要任務就是要取得懷孕證明,以便盡早預約醫院產檢。


打電話去屋企附近私家診所,費用介乎$80-$120驗孕 +另加 $250-$400醫生診症費。記住要確認醫生診症費,有一間診所姑娘開頭話驗孕即知結果只要$120就收咗線。因為其他診所報價都有講埋醫生診症費係幾多,所以我就再打去問驗孕要唔要加醫生診症費,答案係需要嘅。

至於驗孕方法,回覆都係用小便,大多數即時有結果。只有一間要送去化驗所,雖然都係即日有結果,但就要等幾個鐘頭 (先電話覆結果,第二日再去睇報告)。



家計會驗孕都係用小便以及即時有結果,費用只要$70,另加護士評估費$30,total $100,比去私家診所划算。


------------------------------

家計會驗孕


26歲以上或已婚者,驗孕唔洗預約,直接係辦公時間上去就得。我哋就揀星期六朝早去,可以一齊拎報告。


一上到去counter職員就問嚟做咩?我答「驗孕」。職員問幾多歲?係好大聲問幾多歲,我哋都打個突。跟住就俾身份證同埋表格,叫我哋坐喺一邊填。



填好交表就比個樽仔同紙袋,留好小便等叫名。



入房仔就職員量血壓、度高磅重,跟住就係面前驗小便,係用好似快測咁嘅驗孕卡,用吸管滴啲小便落去。過程中有問我之前有無係屋企驗?我話有。職員就話咁你哋都已經知道結果呢!(笑)不過都要嚟拎個證明啦!



跟住再出大廳等叫名見姑娘。


一入房,姑娘就拎出剛才嘅驗孕卡同我哋講恭喜。跟住就話孕婦唔係病人,除咗生冷嘢之外都唔使點戒口。產檢唔需要次次照超聲波。 家計會有早期懷孕評估,有興趣可以預約,只限12周內及僅提供一次評估。冇問題就走得。(講講下佢就隨手將驗孕卡掉到垃圾桶,本身我想留嚟紀念架)


如是者,$100 就拎到懷孕證明!!不過留意返家計會懷孕證明只係寫幾時最後經期,唔會寫預產期係幾時。






張貼留言

1 留言

Related Posts Plugin for WordPress, Blogger...